75 - Salóme Hollanders, "það sést í jökulinn héðan", Olía á striga, 60x75cm, 2025.

Salóme Hollanders (f. 1996) er myndlistarmaður og hönnuður búsett í Reykjavík. Hún lauk BA námi í vöruhönnun við Listaháskóla Íslands vorið 2022. Í gegnum verk sín tekst Salóme á við mörkin milli myndlistar og hönnunar og nýtir þannig rýmið sem skapast við skörun sviðanna tveggja.
Hún vinnur í fjölbreytta miðla, þar á meðal vöruhönnun, málverk, skúlptúra og innsetningar. Salóme vinnur gjarnan með andstæður á borð við geómetríu og kerfi í bland við flæðandi og lífræn form. Hún kannar mörk efniviðarins og færir hann inn í samhengi sem kann að virðast honum framandi, með áherslu hið óvænta.
Í nýjustu verkum sínum hefur Salóme sett sig í búning landslagsmálaras þar sem hún skoðar náttúruna í gegnum formgerð og liti. Verk hennar endurspegla sífellda togstreitu milli formfestu og þess ófyrirsjáanlega, strúktúrs og flæðis.
Salóme hefur sýnt verk sín bæði hér á landi og erlendis og hefur meðal annars haldið einkasýningu í Listasafninu á Akureyri árið 2024.