28 - Halldór Sturluson, "Án titils", Blönduð tækni, 58x37cm, 2023.

Halldór Sturluson er fæddur árið 1982 í Reykjavík. Hann lauk fornámi
frá Myndlistarskóla Reykjavíkur og BA gráðu frá NABA, Nuova Accademia
di Belle Arti í Mílanó. Hann hefur haldið margar einkasýningar eftir
að hann lauk námi og sömuleiðis tekið þátt í fjölmörgum samsýningum.

Verkin á sýningunni eru litastúdíur þar sem pappír er útgangspunkturinn.
Þegar horft er á myndflötinn sjáum við þverskurð litaðra pappírsrenninga
sem raðað hefur verið saman í ólíkum litasamsetningum. Með því að raða
pappírnum upp á þennan hátt renna ólíkir litir pappírsins saman og mynda
nýja liti, líkt og þegar málning er blönduð, og verður áferðin allt að
því flauelskennd.

Verkin vísa í jarðlög sem hlaðast upp á ólíkum tímabilum, rétt eins og
æviskeið manneskju sem tekur stöðugum breytingum. Hvert tímabil hefur að
geyma marglaga litbrigði, þar sem litir tóna saman á pressuðum fletinum
og renna að lokum saman í eina heild.