19 - Aðalheiður Valgeirsdóttir

Aðalheiður Valgeirsdóttir er myndlistarmaður, sjálfstætt starfandi listfræðingur og sýningarstjóri. Hún útskrifaðist frá grafíkdeild Myndlista-og handíðaskóla Íslands árið 1982 og hefur unnið að myndlist síðan. Hún lauk BA og MA gráðu í listfræði frá Háskóla Íslands. Hún hefur haldið fjölda einkasýninga m.a. í Listamenn gallerí, Gerðarsafni, Ásmundarsal og Hallgrímskirkju og tekið þátt í fjölda samsýninga hér á landi og erlendis.

Hún hefur unnið ýmis verkefni á sviði listfræði, sem kennari og greinahöfundur og verið sýningarstjóri í söfnum og galleríum. Myndheimur Aðalheiðar hefur frá upphafi hverfst um náttúruna og nálgunin tekið breytingum í áranna rás. Verk hennar eru unnin á mörkum hins raunverulega og hins huglæga í beinum tengslum við náttúruna og síbreytilegar birtingarmyndir hennar allan ársins hring.

Gróður og lífræn form einkenna verkin á sýningunni þar sem leitast er við að túlka iðandi lífskraftinn með olíulitum á striga. Aðalheiður er félagi í SÍM, FÍM, félaginu Íslensk grafík, Nýlistasafninu og Listfræðafélagi Íslands. Hún býr í Reykjavík og í Biskupstungum þar sem hún hefur vinnustofu.